戆鸠鸠，行路上广州
喺广府话里头，有一句话叫做“搭11号车”，即系“行路”咁解，皆因“11”似两只脚。讲开行路，年长者实晓讲一句“行路上广州”。实际上“行路上广州”系句粗鄙话，全句为“戆鸠鸠，行路上广州”。亦有一句叫做“戆鸠鸠，食丰收”俗语，查实两句话有冇关系？关系就冇，不过两句重点都喺前半橛，都系话人愚蠢。
相传呢句俗语源自民国时期嘅省港大罢工。时维民国十四年六月，香港十几万工人举行大罢工，声明拥护上海工商学联合会提出嘅十七项条件，并提出香港市民有政治自由、法律平等、普遍选举、劳动立法等六项要求（咦！咪仲激过2019年多多声！）。港英当局实行紧急戒严同封锁，对付罢工，引起罢工民众愤怒，纷纷离港到广州。港英政府初时态度强硬，下令九广铁路停驶，故此离港工人多数只能以步行方法返回广州。
本来，交通工具尚未发达嘅上世纪二三十年代，以步行方式返广州甚至更远嘅地方，系閒过立秋嘅事，但有人笑呢班工人俾政客煽动利用，做咗人棋子都唔知，相当戆居，故此以“戆鸠鸠，行路上广州”呢句说话嘲笑佢哋。
顺带一提个“上”字，正所谓“北上南下”，故此香港人北上，无论广州、东莞、深圳，都系用“上”字嚟表达。
戆鸠鸠，食丰收
上面提到过“戆鸠鸠，食丰收”呢句话。广府话喺话人愚钝嘅时候，每每夹杂粗口，例如“笨柒加个箍”、“柒懵懵，揸电筒”、“柒吓柒吓”诸如此类。上世纪六七十年代，讲得最多嘅相信系“戆鸠鸠，食丰收”。查实后便仲有两句：“䟴䟴脚（un un脚），食百雀。鸠流流，食银球。”押韵贪口爽之余，更同三只香烟牌子有关。
粤语旧时隐语多箩箩，但系到咗而家后生嘅一代，十之八九都经唔识得讲，近乎已消失。同烟有拏褦都数得出几个，吸食鸦片烟曰“咬云”，吸纸烟曰“咬蔃”。因为鸦片烟之烟如云雾，故曰“咬云”，纸烟之状兴树蔃相似故曰“蔃”焉。
旧时人食自捲烟或水烟（“水烟筒”又称“大碌竹”），盒装香烟系“来佬嘢”（来路货），英文系cigarette（细雪茄），与cigar（雪茄）相对，于是又曰“烟仔”。粤语讲“整支烟仔食吓”，普通话讲“抽根烟”，故粤人戏称“抽筋烟”。
广府人鬼马贪玩，故创造出嚟嘅粤语俗语既滑稽又反映咗某一时期嘅社会现状。